東京之旅2015(DAY3)

今日早上我地就出左去酒店露台影恐龍...呢隻恐龍係呢間酒店嘅標記，係2015年先落成正式開業，而家亦都成為新宿嘅一個新地標。

四處仲有好多石雕，主要都係以恐龍為主。

下面呢張係喺酒店房影，都可以睇到新宿一小部份。

近睇其實都幾真實，佢對眼都會著燈...

熱愛恐龍嘅朋友應該都會有興趣黎朝下聖...

酒店大堂仲有一個類似藏書閣嘅休閒空間，可以坐喺到扮下文青都唔錯。

中午我地就去左淺草附近食午餐，網上介紹呢間係一間有200年以上歷史嘅鰻魚專門店。

鰻魚賣相唔錯，都算幾肥美...

仲有d小前菜

有一碗麵豉湯

仲有飯後果（柚子）都幾清甜。

呢到最值錢嘅地方就係一個海景，可以睇到東京地標...

但價錢的確係好貴（對我黎講）值唔值真係見仁見智...

我地就覺得試過一次就ok，未必會有下次了。

之後我地就去淺草附近逛街，順帶一提就係東京唔係每間711都有退稅服務，而淺草雷門寺附近就有一間面積比較大嘅711就有呢個服務，貨品選擇都比較多選擇。

話咁快就黎到雷門寺，呢到人流好多，遊客同日本人都有...

佢都係淺草地標之一，好多遊客第一次去東京都一定會黎呢到參觀。

穿過雷門寺入口就會見到呢到好出名嘅仲見世通，呢到有好多小店賣唔同嘅精品、淺草手信、食品通通都一應俱全。喺呢到一定會買到一D特別手信，但當你第二次去東京呢到未必會再次成為你選擇之一。

呢到有好多信眾黎呢到參拜，但因為我個人信仰關係，所以我並沒有參拜，只係當到此一遊就算。

四處參觀都見到唔少好特別嘅裝潢...

呢到的確係煙火鼎盛，據說只要將煙撥向自己就可以將唔好嘅野送走...

但都係因為個人信仰問題，所以我無試...

喺呢到有好多間租和服嘅小店，所以四圍都唔難見到好多穿著傳統和服嘅人拍照留念。

仲會有日本嘅學校舉行秋季旅行黎呢到參觀...

祈福牌亦都係好多日本寺廟必有嘅...

我就好欣賞呢架單車嘅設計，望落好型同埋都好似幾安全。

之後我地就去左下一站 ----上野 阿美橫町，上網睇到好多人都話必到嘅地方，因為呢到賣嘅野勝在種類多同比較平。但我行左一個圈都無咩收獲，只係買左一個背包就走....

之後我地就搭JR去左池袋行，不過都係無咩收獲，因為時間已經係晚上八點幾，好多舖頭都已經關門，所以已經無咩地方好行，我地去左一個商場食左一杯牛奶雪糕，牛奶味好香濃同埋好幼滑。

跟住我地就喺附近搵地方食晚餐，最後我地決定去食一蘭拉麵。因為香港開左咁耐我都無食過，難得黎到日本梗係食返碗啦！

因為未試過嘅關係，喺門口買飛時已經笑料百出...好彩最後都成功買到一碗好好味嘅拉麵。

食完之後我地就返酒店了...今晚陳生就買左呢個甜品做宵夜，我發現日本人真係好鍾意食忌廉，好多甜品都好鍾意好大量忌廉....

今日就咁喇...明天再續。^_^