今日早上我地就去左一間CAFE食早餐，我好想講我真係好深深咁愛上左佢....
呢間CAFE其實都好多野食，主要都係三文治同意大利粉，但因為我地仲係食早餐，所以就諗住食D輕巧D...
佢地D咖啡都係即磨，但唔係咩太特別，所以唔重點講，不過真係好香濃。
呢份係陳生食嘅豬扒三文治 （日文好似係咩炸豚肉之類...）
都唔講得笑，真材實料，好厚肉又好鬆化，唔乾身...唔錯架！
主角出場喇！！！
我就係為左呢一個PANCAKE神暈癲倒。千祈絕對唔可以用普通PANCAKE作比較，因為我覺得真係無得比。（至少喺香港食唔到咁好味先）
超厚身，但唔實！好鬆軟兼好香蛋味...配埋個黑糖就真係無得輸！（佢仲有其他醬料、忌廉選擇，黑糖純為個人喜好）
之後我地就去左一個叫中野嘅地方，黎呢到嘅原因純因為我偶像杜如風介紹過呢到樓上三層都係賣模型、玩具嘅地方，咁我地就梗係要黎朝下聖啦！
唔黎尤至可，一黎我地就行左幾粒鐘！係三層商場我地行左幾粒鐘！！！
D玩具精品多到你睇唔哂，買唔哂...好多古董、絕版嘅，佢呢到都搵到。
我都係喺呢到搵到兩個古董洋娃娃，同埋搵到兩個絕左版嘅"烘燶麵包"錢罌比我個契妹，佢收到之後開心都幾乎嗌左出黎。
（因為我地係咁掛住行同買嘅關係，今日結果係無影到相，行到連肚餓都唔記得，之後匆匆咁去食壽司，結果都唔記得影相...）
而且因為太晏同行得太耐嘅關係，我地連下一站都無去，十點左右就返左酒店了。
不過都買左D飯後甜品都飲品...呢隻益力多就咁睇好似無乜特別，但其實佢係迷你BB版，比香港飲開嗰D仲要再細SIZE...如果有小朋友就啱哂！而且我覺得仲無香港飲開咁甜，幾好味！可惜最後都唔記得買D返香港... >_<
另外就買左以下嘅雞蛋布丁食，雖然係711出品，都學杜如風話頭︰佢真係唔係揸流灘喎！蛋味幾香，又夠滑，真係唔錯。
第二日就係咁多喇，好似好少野好簡單咁...但其實已經行到（企到）腳痛到媽媽都唔認得...所以下回再續喇！
晚安！^_^
嘩!行街街行一日! ^_^
回覆刪除