台北之旅 2016 （Day 1）

2016年2月我地去左台北跑了一轉，短短五日開心同難過都一一發生....

2016年2月28日第一天....喺機場食過早餐就準備等上機....

今次我地嘅兩位小拍檔就係兩位小奸夫...^____^

上機前梗係要影返張合照留念啦！

我真係好鍾意呢兩位小朋友架....^____^

上機喇....佢地當然都有自己嘅私人座位啦！

每次去到呢個畫面都係充滿期待.....

又係食飛機餐嘅時候喇....其實好多人都話飛機餐好難食，反而我覺得都可以接受...

因為有得食證明我又有機會去旅行嘛...哈哈~

又黎到我最熟悉嘅台北喇....好掛住你（台北）呀！

搭過國光車去台北車站轉捷運就黎到我地今次住嘅地方，位於森林公園站出口嘅『丹迪旅店』，鄰近永康街附近。其實我地幾乎每一次黎台北都係住呢間旅館，或者係我個人本身唔係好鍾意改變，簡單舒服就好足夠。

因為今次黎嘅時間係剛剛過完農曆新年，所有旅館四處都仍然見到好多新年擺設。

今次因為陳生一早同旅館講左想比個驚喜我，當再同我慶祝十週年...所以旅館一早就準備好一D小心意送比我地。

仲有香檳同賀卡以及精美小食.....

望到呢個畫面真係好開心...小小嘅旅館，但佢地花喺住客身上嘅心意絕對不少。

辦理好入住手續之後，我地就去左永康街搵食。今次我地就去左我想食好耐但咁多次都無去食到嘅『度小月』，其實並唔係好特別，只係朋友講過唔錯，所以一直都好想搵機會試下。

圍返港幣百幾蚊都算可以接受....

呢個就係「黃金雀巢」...入面好似係蝦肉卷、炸蝦丸....我已經唔係好記得，因為唔係太特別。

呢個就係「炸大腸」，其實香港都食到，不過記得陳生鍾意食，所以叫左一客...

唔夠脆同埋完全無肥膏，相對可能較為健康，不過如果食得呢樣都唔諗健唔健康啦！所以我覺得都係麻麻地...

下面呢兩碗就係佢地最出名嘅棵仔麵同擔仔麵...我都係覺得無驚喜，唔難食囉。

呢到四處都係充滿中國風，餐具都係印左店名...整體黎講唔差，一試無妨，不過唔好有太大期望。

之後行左一陣我地就去左下一站 ---- 基隆。

搭咁耐車目的都係為左黎呢個夜市，食兩碗野...

「邢記鐤邊趖」係唯一得基隆一間店，你問我有咩咁好食，我又唔識點解釋比你聽...因為佢嘅配料的確唔係咩特別食物，只係放埋一齊之後，食過又真係覺得唔錯。

入面有兩條好似腸粉嘅野就係鐤邊趖主要材料....但我食左好多次都唔知其實係咩黎...如果你知道係咩記得講返比我知！^____^

之後另一檔必食嘅就係吳記魷魚羹 + 油飯，我食過其他店嘅魷魚羹，但始終覺得呢檔係好食D...（不過今次再食已經差左...可能多人食左，所以開始粗製濫造）

無錯！我地山長水遠去到基隆只係食左兩碗野，行左個圈就走左....

（我都覺得幾浪費時間，所以下次都未必會再去了）

之後我地就轉戰下一站 ---- 饒河夜市

一路走來都發現多左好多燈飾好靚，可能係因為新年嘅關係啦！

影完靚景就去食喇....因為掛住買同食，所以......無影相。

只得下面呢幅蟹肉，我食足四年，每次都一定會買。（就喺夜市入口處）

雖然愈賣愈貴，但我始終覺得係得呢檔最好食，所以每次陳生都會同我黎返呢到買....^____^

唔好意思！我嘅台北之旅可能比較悶，因為我年年都黎，所以只當自己返鄉下渡假，希望唔會悶親大家...DAY 1 完。