東京之旅2015 （戰利品篇）

今日終於都有時間寫返篇有關我今次喺東京買左D乜喇...

第一日我去OUTLET同埋築地，主要都係買左好多衫同埋好多鞋...因為有D真係好平。就好似呢件風褸，喺OUTLET買唔洗200蚊港幣，個袋都係120蚊港幣。

件褸仲要唔係一般風褸好薄身，佢係偏厚同擋風的。

個布袋就純粹係我好想買個全COTTON布嘅袋，貪佢夠襟用同埋可以放洗衣機洗，呢D袋一般如果唔係放好多重嘅野，基本上係唔會爛。所以120蚊仲要有牌子嘅真係好抵。

另外都喺OUTLET買左D內衣，不過唔POST喇...但係一個香港好出名嘅W字頭嘅牌子，OUTLET買就足足平香港一半有多...圍返平左幾百蚊港幣。

另外就係陳生身上著住呢件風褸，應該係全OUTLET我地買嘅野入面最貴嘅，要10000日圓，圍返差唔多700蚊港幣，但陳生話呢個牌子香港好少有而且好貴，係專業嘅outdoor牌子，防風防水，但又透氣...（我對行山用品唔了解）所以最後佢揀左好耐，我迫佢買左呢件褸，當係今次結婚紀念日嘅一份禮物啦！^___^

下面呢兩件就係我喺築地買嘅T恤，因為我本身好鍾意KITTY，所以見到梗係唔放過啦！不過其實都算貴，因為每件都要港幣 200幾蚊（因為日本其實好多地方買衫都好平）

不過都唔後悔嘅，因為質地都唔錯，而且我之後都無喺其他地方見到一樣款嘅衫。

我仲買左兩對木筷子，點解？因為據講日本人其實好重視佢地用嚟食飯嘅筷子，所以佢地選嘅用料都會比較講究，呢對木筷子上面仲印左我同陳生嘅生肖...

另外喺築地買左三隻招財貓BB...陳生問我買黎做咩？我其實只係覺得手工幾靚，同埋每隻色都有唔同意思...當手信都唔錯丫。每隻100日圓。

另外下面呢兩條好似磚頭嘅物體就係日本傳統食品----羊羹。據講日本人以前好鍾意食，但而家已經好少地方有得賣，開始失傳。我地就買左兩條比奶奶試下，因為佢好鍾意食甜品，之後佢都話好食，味道唔錯。（不過奉勸大家唔好一次過買得太多，因為真係好重架！）

下面呢兩包都係日本小食，諗住買比媽咪的。

嗱！最精彩嘅一張出場喇...我地一日之內一共買左九對鞋（其中兩對係陳生的）

無錯！其他七對都係我嘅...我D朋友睇到張相第一個反應係︰好平呀？

係呀！D波鞋同對水鞋都比香港平一大截...另外嗰幾對皮鞋呢...每對平均唔洗4000日圓（未計退稅）但最重要係...佢地手工好好，著得好舒服。（雖然都係MADE IN CHINA）

但如果喺香港買一定唔止呢個價！因為佢地全部鞋底都有健康軟墊，同埋即使係新鞋，第一次著都唔會腳痛。我本人就有個怪現象，著親新鞋都介腳，會損哂...所以偶然一次機會下喺網上睇到台灣一個達人介紹東京0101地庫有一間鞋舖入面賣嘅鞋全部都係舒適鞋，所以我就特登走去搵，結果我買左三對...（我而家都成日著，好舒服）

以下兩個公仔就係我喺中野買嘅...兩個都係二手嘅古董公仔，白色花裙嗰個仲要係音樂盒黎。

可能因為係二手，同埋款式比較舊，所以價錢好平...

而我就係因為細個時無錢買玩具，所以大個之後就好鍾意儲公仔（洋娃娃類型）

所以今次買到呢兩個公仔我真係超級開心...

講真，呢D款而家就算有錢都唔係咁容易買到...以前外國呢D公仔手工真係好好，連D衫仔都車得好好...

下面呢D都係普通嘅頭飾同襪，日本嘅襪好多都好平好靚，質料仲唔錯架。

（當然係平過香港好多啦）^___^

其實我另外仲買左幾頂帽，不過無影相。

呢D迷你手板公仔喺中野多到你睇唔切，買唔晒...陳生都買左好多...不過因為太細細粒，我地就無影相。不過如果有人係鍾意儲呢D或者係動漫公仔、模型，咁就一定要去中野走一轉喇。

下面呢堆其實係洗面蒟蒻，係喺淺草一間專門店買。杜如風之前都有介紹過，唔係特別平，不過其他地方一定買唔到。仲幾好用添，洗得幾乾淨，洗完塊面唔會覺得好乾，所以都值得推介。

下面呢D都係淺草買嘅一D手信，無咩太特別，只係覺得幾有特色所以買黎做手信。

呢D蛋黃哥精品就係喺711無意中見到，覺得幾得意又買。

下面呢D全部都係我自己嘅，都係一D好日本色彩嘅袋仔同環保袋，都係ONLY FOR JAPAN SALE。

呢個背包相信唔洗多介紹啦！而家香港通街都有...

（我買嗰陣係仲未開始HIT...）其實我想講日本買係平過香港買好多，而且香港好多其實都真係老翻黎...

呢一袋就係我地喺淺草嘅711買嘅野（之前都有提過東京暫時係得淺草呢間711有退稅服務）

唔好奇怪點解711都買到咁多野，呢D都係買比朋友嘅手信，平就唔洗講啦！仲有好多小食、糖果係ONLY FOR JAPAN SALE，香港係買唔到架！

（聽聞好多仲幾好食添）

去日本行藥妝店乃常識吧！

尤其下面藍藍地色C字頭呢隻，香港係貴一倍有多，所以一定要入貨！

（我係極度敏感皮膚，好多牌子護膚品我都唔用得，所以搵到啱用就買啦！）

SKII 唔使介紹啦，又係因為香港好貴，所以過黎買...

另外嗰支就真係重點推介！MIMON呢隻牌子香港暫時真係好難買到

（除左代購或者小部份水貨店會有）

佢係專為敏感皮膚而設，保濕效果真係唔錯！尤其今次去完東京返香港，我D皮膚係敏感到近乎爛面...除左搽醫生開嘅藥膏外，我只用佢，做返基本補濕補水，真係幾好用。

下面呢兩袋都係D平時好常會用嘅面膜、腳貼、眼膜、髮油之類......因為買夠一萬日圓有得退稅，不過全部都入袋唔拆得，我已經唔記得實際買左D咩...

之後我又買多左一對NIKE嘅波鞋，唔係特別平，純粹覺得啱用同靚。

下面呢兩個都係711買，毛毛暖手包，好軟林林...不過我唔捨得用，怕整污糟...

呢盒叮噹銅鑼燒係喺淺草買，皆因有個朋友叫我幫佢買D特別D嘅叮噹，但我又搵唔到有D咩係特別D...結果我買左呢盒比佢。（佢話我好殘忍，要佢食哂叮噹全家...哈哈哈哈~~）

下面呢堆都係原宿竹下通買...D衫好平好靚，所以都忍唔住買左幾件...

下面呢D就係喺『愛麗絲夢遊仙境』專門店買嘅耳環...

呢隻就係原宿 LINE STORE 買嘅其中一隻熊大，其實佢係八達通套（好彩喺日本買左，香港門市已經斷左貨。不過我都係唔捨得用...好驚整爛或唔見左...）

下面呢隻錶就係今年陳生送比我嘅結婚週年禮物喇...（雖然香港都有...）

不過我好鍾意！^___^

下面呢幾件就係喺台場蛋黃哥同SNOOPY店買嘅幾件T恤同一件風褸...

（我想講真係好平囉...同埋件風褸係真係暖架！）

呢個係一個好大個嘅布袋...只係700日圓。

呢對襪我唔記得幾錢，好似300日圓...但賣點係----佢成對都係毛毛架！好軟熟架！^_^

呢件風褸真係好抵...入面全部都係抓毛...我記得係千幾日圓。

後面好靚架！^___^

呢盒粉底就係喺涉谷買...嗰到得呢間舗頭我係行到唔捨得走...因為入面全部都係賣而家日本最新嘅特別版化妝品....

我係一直用開呢隻牌子香水，知道呢到平D所以買左一支。

呢支係陳生嘅....

呢支睫毛液又係重點推介！！！

我用過好多好多唔同牌子嘅睫毛液，好多一係好易溶、唔防水、變熊貓眼、難乾、黏到一束咁....等等，係得呢隻我係用得好開心，因為完全唔會有以上嘅問題，而且效果好好！佢係第一支我用完會再買嘅睫毛液。（我呢支係For增長，佢另外仲有濃密同埋有一隻好似係有雙重效果，我唔記得！因為我only只用增長。）

呢兩支純粹係特別版，粗用之後可以收藏紀念。

下面呢個手袋仔係喺自由之丘度買，其實佢係一個全毛毛嘅袋，係真係For你放細細部相機用。

呢隻係小奸夫，係我最愛嘅公仔之一...我屋企有好多大大細細唔同樣嘅都有...佢地已經成為左我嘅好朋友同旅行必備嘅好拍擋。^___^

點解去日本一定要買遮？我之前都問過朋友呢個問題，直到今次陳生講比我知我先知原來最大嘅原因係呢隻牌子嘅遮好靚同好襟，不過香港唔係四圍有，而且賣得好貴...（香港係賣緊過百蚊一把）日本係平一半有多...

下面呢把係陳生...好特別嘅設計，同平時用嘅唔同，佢個手柄開左之後唔係喺中間，而係喺側邊...不過影唔到比大家睇。^___^

奸夫毛毛袋...好可愛呀！^_____^

今次大至上係咁多喇...其實睇返都真係好豐收...每一日都玩得好開心買得好開心...希望不久嘅將來會再有機會同大家分享多一次日本之旅啦！^___^