東京之旅2015(DAY5)

黎到第五日喇，之前幾日行程主要都係shopping，（雖然好似杜如風話齋邊到都可以買到野）但今日我地就買DD，玩多DD啦！^___^

我地今日早餐都未食就出發去今日嘅目的地---- 台場。

搭JR再轉呢架無人駕駛列車海鷗號就可以去到....

沿途都可以睇到好多好靚嘅風景，當然唔少得日劇最常見嘅場景 ---- 彩虹橋啦。

話咁快我地就去到目的地喇！

一出台場車站無耐就見到一個商場，一入商場就比我發現第一個SHOPPING景點...哈哈哈哈...

呢間舗入面賣嘅全部都係蛋黃哥同SNOOPY嘅衫同精品，我睇左好耐左揀右揀都唔知要邊樣好，因為選擇太多同埋價錢好平，D衫平均都係1000日元左右。不過我諗應該唔係主題專門店，可能定時就會轉換主題。

掛住買都唔係辦法，出去透下氣比頭腦清醒下，順便睇下有咩好食先。

嘩...你地睇下個風景幾靚...香港市區邊到搵到咁靚嘅景丫。

跟住去咗呢間人氣pancake店食我哋既早餐＋下午茶。

睇到成座山咁高既cream，真係未食都飽咗一半...

食完嘢就繼續行，見到LEGOLAND好想入去睇下，但原來侍兩個成年人必須要帶住一個小朋友先入得..結果只可以喺門口影張相到此一遊啦！

（每月逢10號會全面開放，但黎之前最好都係上網睇清楚先，免得白行）.

之後我地仲經過一間蠟像館，但因為要買飛入場而我地對蠟像興趣不大，所以都只係喺門口同其中一個蠟像公仔（LADY GAGA）影左一張相，不過仿真度又真係幾高，我都覺得佢好似真人...

再繼續行左個圈就見到有D陰森感覺，原來呢到仲有個鬼屋，不過我地都係無入去，因為我太細膽。（其實我真係唔係好明點解要比錢請人地黎嚇自己呢？無啦啦驚餐飽為咩？）@_@

見到外面D裝潢都打冷震...我就一定唔會咁虐待自己囉...

之後再行行下就見到一個迷你美食廣場，入面都好多日式小吃，不過因為已經食飽所以我地都無深入研究有咩食。

之後上到三樓就搵到我地今日黎呢到嘅其中一個目的地喇...

就係 3D館...之前見同事黎過玩，影左D相好特別，所以

就決定黎玩下睇下...

我仲喺入口處搵左個指導員影左張合照，佢覺得有人搵佢影相好意外，感覺好好笑！^___^

3D館全程只得一個入口同一個出口，即係比左錢入左去就唔可以掉頭走，一定要玩到最後。

（我諗同玩鬼屋原理一樣囉。）

喺現場每幅圖都會有指示教你應該點擺POST...就咁現場睇其實唔覺，但影出黎效果就好好笑，而已當你玩哂全場之後，你會覺得好攰，好似做完一輪運動咁。^_^

好似下面呢張就係影完之後倒轉睇嘅效果喇。

影嘅時候記得要入戲，咁影出黎嘅效果先會好。

其實我張張嘅表情都差唔多，反而我覺得陳生扮得好似...哈哈~

得返個頭？表演魔術咁，其實....只係枱底裝左塊鏡。

臨走前因為唔識聽日文，結果比出口處嘅姐姐戲弄，以為跌左錢，點知...張銀紙原來係3D館最後一PART...我覺得自己瘀到爆囉。哈哈哈哈~

好喇！3D館就玩完喇...入戲肉喇！黎得台場就梗係要朝聖啦！

以下呢個機械人你無理由唔識卦？！

又係拋金句嘅時候喇︰「男人愛高達，女人唔明白。」

會有幾唔明白？唔明白就係明明影嘅時候仲係天光，但有人終於肯走嘅時候，已經天都黑齊囉。呵呵！

合照就一定唔少得啦...其他嘅獨照啦、拍片啦都唔少...

我唔POST喇，因為唔夠位！^++++^

真係天黑架，我無呃你，你地睇下個夜景係咪好正先！^__^

咁浪漫嘅夜景梗係要影合照啦，唔好浪費嘛！

影完哂之後都已經差唔多九點，好多地方都關門，我地都準備回程去食晚飯。

去到車站月台又見到男神望住我呀！唔係唔影呀？^___^

最後我地返左新宿食晚餐，就喺酒店附近嘅一間連鎖店食海鮮燒烤。

間舗頭個名叫『『磯丸水產』，主要提供海鮮燒烤。

不過應該唔難搵，因為我見好多地區都會有佢嘅分店。

都係犯同一個錯誤，就係因為我地唔識日文，所以唔係好識叫野食。日本好多侍應雖然都識英文，但都真係要好簡單嘅英文佢地先聽得明。所以我地就好簡單咁叫左個拼盆同幾樣小食。

日本食剌身正就唔使講啦，但D海鮮真係好食到無得彈，仲要全部都大大件，D蜆有手掌咁大隻。

食燒烤就梗係唔少得飲啤酒啦！其實平時我唔係好飲酒，最多都係同陳生一齊先會飲，因為酒量唔好，同佢飲我唔驚自己會飲多左嘛！^_^

呢隻魷魚真係好好味，又夠厚肉...今次黎日本真係肥足10磅。

套餐只包海鮮，我就另外再叫左D串燒食...真係樣樣都好好味呀！

扇貝大隻到有我塊面咁大...

最尾原來仲有個酒煮蜆，但我地兩個人已經食到好飽，飽到支持唔住喇！

平時如果喺香港食，呢餐我諗唔使一千都要八百。

但喺日本食就唔使500港紙...真係好抵。

（九龍城食隻蟹仔都閒閒地收你200-300蚊啦）

仲要呢個酒煮蜆D蜆都好鬼大隻下...

食完呢餐已經夠飽，今晚食唔落宵夜喇...

不過沖涼就真係要沖好耐，因為全場都係食燒烤，D頭髮、衫褲都吸滿油煙味...

我件褸臭足三日...=___="

明天再續...晚安！