東京之旅2015(DAY 4)

第四日嘅行程就開心喇！因為今日全日都係 shopping day.....

目的地就係原宿喇！

去到原宿首先就梗係去食我偶像介紹嘅龍蝦包啦！

真材實料架！據講係因為老闆屋企係主要做海產，咁捕獲到新鮮龍蝦賣比人，不如自己做埋啦！於是就開左第一間用龍蝦包專門店。

都幾重手架，全部都係用龍蝦鉗嘅肉黎做，真係啖啖肉架....不過因為佢係凍食，所以我就覺得有D美中不足。（因為我鍾意食熱包）

之後我地就去左另一個原宿好出名嘅主題商店"愛麗絲夢遊仙境" 主題店....

個門口真係好細...

喺入面唔難見到好多關於呢個童話故事嘅裝飾

其實我細個時唔係睇過好多次，所以有好多野我都覺得有D陌生...

入得黎除左參觀，就梗係買下野啦！呢到有好多以呢個故事做主題嘅飾物同小食，女孩子們入到黎都唔難有收獲，我都買左兩對耳環...^_^

其實都構思都幾特別，同埋都有少少好似入左佢地個世界咁...

之後就去原宿另一必到地方---- 竹下通 

呢到人來人往，都幾多人...就好似香港嘅女人街，台北嘅西門町一樣...

仲有日本10蚊店...（以今次去日本嘅日元計算，平均每件唔洗7蚊港紙。)

四周都有好多唔同類型嘅女孩子精品店，好似以下呢個就係專賣時下好流行嘅"大眼仔"

佢嗰到話戴左之後會望到個女仔對眼入面有卡通人物個樣...

我咁大個女都未戴過隱形眼鏡，亦唔打算試...因為我想像唔到將塊膠片放入眼睛嘅感覺。

多謝媽咪生我出黎幸運地無近視呢個問題...^___^

喺竹下通瘋狂買完一輪之後，我地就去左另一個地方朝聖...LINE STORE！

入面有隻超級巨型嘅熊大，作為佢嘅粉絲點都要影返張留念啦！

入面仲有其他主角公仔場景可以拍照

樓下仲有一層可以參觀同購物

去完呢間SHOP，你就唔會有興趣去香港嗰間，因為太細同太少選擇......

之後其實都依然係瘋狂購物，買左好多野...不過因為已經入夜，所以無乜再點影相。

跟住我地就決定返酒店放低D野先再出去食晚飯。（因為太重了...）

我地喺新宿酒店對出搵到間食剌身飯嘅餐廳，因為太肚餓嘅關係，唔多考慮就衝左入去。

好唔好食呢...就見仁見智啦！點都抵過喺香港食囉。價錢唔貴，不過唔知係咪因為今日行得耐太肚餓，食完唔飽囉。

之後就去左買章魚小丸子返酒店食...大大粒、熱辣辣...好正！

（其實之前喺上野已經食過一次，不過無影相，今次補返）

陳生就喺711買左兩支酒黎飲，綠色好似係青提白酒...

另一罐咩梅X男仕我就覺得極度難飲...難飲過藥水....

今晚就係咁多喇....明天再續！晚安.....