台北之旅 2016（Day 3）

第三日行程比較少，因為天氣唔太好...所以只係四圍行下、睇下咁...

最近聽講台北101附近開咗 line store，所以就去左睇下喇！

其實都係無咩特別，地方亦都好細...影相位相對較少....

我都係喺門口同隻熊大影左張相當到此一遊就算...咩都無買到。（因為大部份其實香港都有，同埋無咩實際啱用...（有的之前喺東京都買左了）

我好想講，東京 line store 真係多好多野賣，同埋真係靚好多囉...

我已經開始好掛住東京原宿間 line store 喇！>___<

跟住我地行左一陣就過左去101嗰邊行下，見到有櫻花就梗係要影返幾張啦！

雖然只得幾棵櫻花樹，不過都真係好靚...如果而家去左日本睇櫻花就好喇！^___^

下面呢隻奸夫就係我尋日去十分時唔見左嗰隻，不過我都好幸運竟然喺台北車站嘅站前店買得返隻一模一樣...（我都好幸運有個咁錫我嘅老公，特登同我去搵！）

而家我已經儲齊呢款嘅大、中、細size...我覺得佢真係好可愛架！^o^

梗係要影返張大合照啦！^++++^

因為天雨關係，我地行左唔係好耐就去左行中山地下街，夜晚就去左士林夜市搵食！

士林嘅羊肉湯係我至愛...每次去都一定會去返同一間食。試過其他夜市都 ok，不過講到個藥材湯就真係士林好味好多喇！尤其冬天天氣凍，飲完碗湯成個人都暖返哂...（講起都想食...）

其實我覺得只係我個人性格問題，好多時都先入為主，覺得好就唔會去第二間...或者食完第二間都會覺得第一間係好食D...

因為陳生唔食羊（佢話只食唔穌嘅羊肉喎）所以去親台北佢都係食排骨湯。

其實湯就應該差唔多，不過佢D排骨勝在夠多，食完都飽飽地....

另外士林仲有個現烤芝士蛋糕我好想買黎食，可惜可能因為我地次次都比較夜先去，而佢又一賣完就關門...所以我都係兩年前食過一次就無再食過喇。希望下次再去台北時可以食到啦！

實在好大雨，我地行完買完就匆匆返酒店喇...下面呢D就係我今日嘅戰利品...

點解會買頸巾？因為台北真係好凍，我地第一次呢個月份去台北，帶唔夠衫，所以就喺GU 同士林買左兩條頸巾...不過真係好抵，紅綠色格仔比較薄少少，喺GU買只係$190台幣...另外粉紅色超厚大頸巾喺士林買，好似係$390台幣...我仲要行左好多檔格哂價又諗左好耐覺得係只鍾意呢條，所以先返轉頭買...^___^

另外都係買左D布口罩同襪...真係好平，冬天有呢D口罩戴住可以暖住個鼻之餘，仲無咁容易吸入太多冷空氣傷氣管。

今日就係咁多多咋...下一篇再續啦！^___^